भित्ताको कान

 

कहिलेकाहीं तिमी

सुस्तरी बोलेको सुनेको छु

भित्ताको कान हुन्छ भनेर

उसोभए

कोठाभित्रै पसेका

या

वरंडामा पलेंटी कसेर बसेका

घामका किरणहरू

आकाशका हजार आंखा होइनन् ?

तिनले

कहां कहांसम्म पुर्याउंदैनन् होला त

तिम्रो मुहार

तिम्रो आकृति

तिम्रो भावभंगिमा

र तिम्रो मनस्थिति,

तिनको कुद्ने गति

तिमीलाई याद नभएको हो र ?

कुरा यत्ति हो

सधैं हांसिराख

सोझो हिंड

र अनावश्यक वखेडा नझिक

तिमी जहांकहीं प्रतिविम्वित भएको हुनसक्छौ

तिमी सोचेभंदा बेग्लै देखिएको हुनसक्छौ

आफ्नो वशमै नभएको कुरा देखावटी नसच्याऊ

आज घामै लागेको छैन भनेर पनि नचिच्याऊ ।