Wednesday, July 8, 2015

क्रान्ति

गाउँमा 
तिमी भत्केको घरको छाना मिलाउँदै थियौ
मैले भनें- भाई,
बल्ल तिमी साँचो क्रान्ति गर्दैछौ 
तिमी भुतुक्कै भयौ ,
मैले थपें-
हाम्रो यहाँ क्रान्तिको परिभाषा सरल छ,
नपढेकाले स्कूल भर्ना हुनु,    
ओछ्यान परेको बिरामी उठ्नु,
या बाँझो खेत खनजोत हुनु  
क्रान्तिकै अनुपम उदाहरणहरु हुन्

मेरो हकमा    
धेरै दिनपछि घरबाट निस्कनु
र गाउँ बस्ती डुल्न जानु
या बिदामा केही दिन घरै बस्नु
घाममा सुकुल बिछ्याउनु 
र नयाँ किताब पढ्न कस्सिनु
या नयाँ गीत सुन्नुलाई 
क्रान्तिकै अग्रगामी छलांग सम्झिन्छु म

पर्ख,  एकदिन तिमी र म 
कहीं कविता सुन्न जाऊँ 
र एउटा अर्को  क्रान्तिमा सहभागी बनौं  

यसपल्ट भने तिमी  बित्पातै  हाँस्यौ |

javascript:void(0)