Saturday, August 20, 2011

बादल र बतास

पुरै आकाशलाई राजमार्ग ठानेर

बादललाई बाहन मानेर

बतासहरु यात्रा हाँकिरहन्छन

कहाँ पुगेर फर्किने हो

या बेसुरमै कतै अड्किने हो

केहि थाहा छैन

कुनै गन्तब्य पनि छैन

तिमी भन्छौ-

बादल कहाँ पो जान्छ र ?

बगर महेन्द्रपूल चल्ने ट्याक्सी झैं

यहीं वरपर घुमिरहन्छ

हिउँद वर्षा रुंगिरहन्छ

मैले त कहिलेकाहीं आकाश शुन्यै पाएको छु

चारैतिर आँखा बिछ्याउँदा

एक टुक्रा बादल नभेटेको छु

माछापुछ्रेको आँखामा सजाउन

एक ठुन्को गाजल नभेटेको छु

फेरि सुटुक्क के लिन आउँछ कुन्नि

खोंचमा बिसाएको देख्छु एकाबिहानै

झोंकमा पुत्ताएको, फन्फनाएको देख्छु

जथाभावी तेर्सिएर

घामलाई छेल पार्छ यो

पहाड पर्बत छेकिदिएर

मनमै ओझेल पार्छ यो

बतास यसलाई ट्यांकर बनाउँछ र

एक मैदान पानी खन्याउँछ

बतास यसलाई लरी बनाउँछ र

एक पहाड हिउँ खन्याउँछ

कहिले खाली खाली यसै पनि कुदाउँछ

कहिले मध्य आकासमै भाइ-भाइ जुधाउँछ

बतास जस्तो अल्लारेको इच्छामा बहकिएर

बादलहरु आकाशमा नाचिरहन्छन

बतासहरु यात्रा हाँकिरहन्छन

Friday, August 5, 2011

फेरि केहि थुंगाहरु

लामो साधनापछि

बल्ल तयार भयो

छोटो कविता

------------

गाऊंभरी बग्रेल्ती

निभेका अगुल्टा

साउन लागेछ

--------------

हरेकसाल दैलोमाथि

पूजा-स्मृति ताजा

नागराजा

--------------

फुल्न थालेदेखि नै

केटाकेटीको सपनामा

सुन्तलाको बुढो रुख

---------------

तीजको मेला

कहाँबाट सम्झिन्छु

गुराँसे पाखा ?

---------------------

पिंढीको कुनाबाट

मुण्टो निकाल्छ

बिउको आलु

----------------

मालती फूल

कसैले लेख्यो र

तिम्रो कबिता ?

--------------

खेतको घर

टम्मै भरिएको

धानको हस्कोले

----------------

अनपढ आमा

अक्षतामै भर्नुहुन्छ

अट्नेजति आशिष

----------------

भैलिनी गाना

पैसामै बिक्री हुन्छ

सुनको छाना

------------------

झिंगाको भुँ भुँ

सुतेको कुकुर

उठेर अन्तै लाग्छ

----------------

फुक्लेको दांत

कसले फालिदेला

घरै कटाएर ?

---------------

हतार हतारमा

छिमेकीको खबर-

केरा रुखमै पाके!

-------------------

लामो बाटो

खच्चड र मान्छे

अनन्य मित्रता

-------------------

लेखिदिएछ निधारमा

कलिलै उमेरमा

नाम्लोले भाग्यरेखा

-------------------------

सुत्नुअघि

सिरक फट्कार्छु

जाडो अझै बाँकी छ

------------------------------

हिउँले गायो

घामको गीत

आफैं पग्ली जानलाई

--------------------

javascript:void(0)