उफ्......
भोलि फेरि उठाउनु छ त्यो
झोला
र बोकी हिंड्नु छ काँधमा
बोकेर
आफू र आफ्नो गह्रौं मनलाई
एउटा अमुक बन्द सुटकेससंगै
भित्तामा आड लागेर बसेको छ यौटा
झोला
र त्यो भित्र छन्
एउटा पासपोर्ट,
बिदेश बसाईंको अनुमति
अक्षरहरुको भीडयुक्त एक कम्प्युटर
केही स्वदेशी पैसा र
पढी नभ्याएका केही किताबहरु
उफ्......
भोलि फेरि उठाउनु छ त्यो
झोला
र बोकी हिंड्नु छ काँधमा
बोकेर
आफू र आफ्नो गह्रौं मनलाई
म हिंडेपछि
साँझसम्ममा
एउटा शून्यपनले भर्नेछ यहाँ
भित्तामा हाँसिरहेको तस्वीर
एकाएक अन्तर्ध्यान भए झैं
या
खेल्दा खेल्दैको एउटा सजीव साथी
बेखबर हराए झैँ
ठीक यसैगरी म आएथें यहाँ
अब जाँदैछु
माकुराले स्वयम् खिचेर हिंडे
झैँ
आफ्नो जालो
एक जुग यसरी नै बितिरहेछ
म नहुँदाको क्षण कल्पेर
मै दुखि हुनु के ठीक हो
?
अहँ, उत्तर पाउँदिन
उफ्......
भोलि फेरि उठाउनु छ त्यो
झोला
र बोकी हिंड्नु छ काँधमा |
र बोकी हिंड्नु छ काँधमा |
No comments:
Post a Comment