झ्याल र पर्दा

संगसंगै जुटेका हौँ हामी

झ्याल र पर्दा भएर

तर, त्यहींबाट शुरु भयो हाम्रो टक्कर

संगसंगै बसेको नाता

हामी संगसंगै खुल्नुपर्थ्यो

हामी संगसंगै बन्द हुनुपर्थ्यो

झ्याल बन्द हुँदा समेत

पर्दा अझै खुल्न मिल्थ्यो

छ्या, शितल बतास र न्यानो प्रकाश

तिमीलाई किन निको नलागेको ? 

तिमी पर्दा भएर सोच्यौ – म त पर्दा हुँ

खुल्नु आबश्यकता नै होइन मेरो

म झ्याल भएर सोचें – म त झ्याल हुँ

खुल्नु धर्मै हो मेरो

यस्तै हठलाई

हामीले आ-आफ्ना पराक्रम ठान्यौं

आखिर, आजित भएर टुटें म एकदिन   

तिमीलाई ख्यालै भएन

कारण, तिमी बाहिर हेर्दैनथ्यौ

घाम चिन्दैनथ्यौ, जुन चिन्दैनथ्यौ

झरी नजान्ने, हुरी नजान्ने तिमीलाई

गमलामा हुर्कंदै गरेको मनिप्लान्ट

खतरामा छ भन्ने के थाहा ?

लौ म हिंडे,

ए, भित्र कोही त होला

  यो कक्रिएको पर्दालाई पन्छाएर 
एकपल्ट बाहिर चियाइहेर्नु 

यतिन्जेलको मेरो उफानी सकस 

चर्केका खापाका डोबहरुमा पढ्नु |