बट्टा र भित्ताको कथा

भित्तामा एउटा खोपा थियो

तिनकुने सानो खोपा  

र मास्टरबाले अटाइ नअटाइ

त्रिफला चूर्ण राख्थे त्यहाँ

त्यो सकियो

त्यही बट्टामा

मास्टरनी आमैले भरिन्

नौनी खारेपछिको घ्यू

र राम्ररी बिर्को कसेर

त्यसैगरी राखिन् त्यही खोपामा

अटाइ नअटाइ !

मध्यरातमा खोपा चरक्क चर्कियो

भित्तामा दह्रार पर्यो

दलिनको जोर्नी सर्कियो

र जस्तापाता व्हांग पर्यो

त्यहींबाट शीत खसेर

मास्टरबाको बुढी औंला हुँदै

मझेरीमा झरेर

अंगेनातिर बग्दै रहेछ

चिसोले उनी ब्युँझे र

सबैतिर नियालेर भने-

हरे, ओखतीको काम !