Wednesday, February 4, 2015

स्टुडियो शहर

कुनै मेला उत्सबमा झैं
शहर आजपनि व्यस्तै थियो  
देख्नासाथ उसले सोध्यो –
यात्रु, आऊ, तिमी कस्तो तस्वीर  चाहन्छौ ?
मसंग थरि थरिका हिमालहरू छन्, पर्खाल झैं बसेका
ढांचा ढाँचाका पहाडहरू छन्
खोला छन्, नदी छन्, गुफा, झरना छन्
भन, कहाँ बसेर खिच्छौ ?
छतमा कि झ्यालमा ?
डाँडामा कि तालमा ?
गुराँसको फूल या झोलुंगे पुलसित ? 
पृष्ठभूमिमा यो हिमाल नै खूब चल्छ
त्यसलाई पनि दायाँ बायाँ सार्न सकिन्छ  
रङ्ग पोतेर 
रातो, पहेंलो र गुलाफी पार्न सकिन्छ  
आज दिनभरी घामसंगै घुम्नु मात्रै ,
जंगलबाट बिस्तारै उठेर
माछापुछ्रेमा घुम्टो राख्दै निकाल्दै गरेको बादल, 
अकस्मात खनिएर 
बलेंसीमा तर्र झरेको  वर्षा , 
कुनै सिलसिला नछुटाउंला 
तिमी ढुक्क हुनु,
बेजोड सुन्दर र ताजा तस्वीरहरुको लागि 
यहाँभन्दा अन्त नसोच्नु,
तिम्रा रहरैपिच्छे घाम छायाँ मिलाउने   
म स्टुडियो शहर हुँ
तिम्रो मनकै एल्बममा चम्कीबस्ने 
क मोहक, बेदाग जादुगर हुँ |

1 comment:

javascript:void(0)