एकदिन मैले उसलाई साहित्यकारकहाँ भेटें
खुब गफ्फिंदै भन्दै थियो -
साहित्यकारको कामै के छ
छ्यास्स लेखिदियो
ट्यांस्स टाँसिदियो
पत्रिकामा छापिदियो
बस्
अर्को दिन उसलाई
प्राध्यापकको घरमा भेटें
ऊ भन्दै थियो -
मास्टरी जागिर
उही पढ्यो
उही पढायो
भुरा भुरीलाई रटायो
बस्
फेरी अर्को दिन
डाक्टरकहाँ भेट भयो ऊ
भन्दै थियो -
नाडी छाम्यो
पैसा डाम्यो
बस्
संयोगले
बिमानचालककहाँ पनि भेटें उसलाई
भन्दै थियो - पाइलटको काम
ह्यान्डल उठायो, भुर्र उडायो
ह्यान्डल दबायो, भुइंमा गुडायो
बस्
(कुरा सुनिरहेका छिमेकी बाले
झोकै चलेर प्वाक्क सोधे-
अनि के चैं गाह्रो छ त यो दुनियामा ?
ऊ बोलेन, कुरा अन्तै मोड्यो
त्यसदिन संगसंगै फर्किंदा
उसले मलाई सोध्यो -
होइन सर,
म पुग्छु ज-जसको घर
यहाँलाई नै भेट्छु बरोबर
