तानाशाह शासक र चराहरू

 

‘मभन्दा माथि आकाशमा

चराहरूलाई यसरी स्वतंत्र उड्न दिनु

उचित हो कि होइन ?’

तानाशाह शासक सोच्छ

संतहरू भन्छन् - ‘यो प्रकृति हो’

देवताहरू भन्छन् - ‘यो सृष्टि हो’

जनताहरू भन्छन् - ‘महाराज !

चांगुनारायणको गजुरैबाट पनि चरा उड्छन्

सांखुका महादेवको जटामै पनि चरा बस्छन् ‘

शासकलाई यो कुरा उति रूच्दैन

तर ऊ बिलखबन्दमा पर्छ

उडिरहेका सप्पै चरालाई

उसले खसाल्न सक्तैन

एउटा खसालिसकेपछि फेरि

अर्को उड्दै आएको उसलाई सह्य हुँदैन

कति चराहरू यसरी खसालेपछि

बाँकीले उड्न छाड्छन्

उसलाई पटक्कै थाहा हुँदैन ।